lunes, 11 de abril de 2016

Obradoiro de primeiros auxilios en Vigo (fotos)

O pasado día 1 de abril tivo lugar en Vigo, nas instalacións de Vigosónico unha charla-obradoiro de primeiros auxilios en bebés e nenos. Tivemos un gran profesional sanitario como poñente, Pepe Aguilera, enfermeiro do 061 de Galicia e ante todo papá. Pepe explicounos a diferencia entre afogamento e atragantamento, no primeiro caso comprobar se respira, como estimular e no caso de que non haxa resposta como facer unha RCP. Tamén como reaccionar e que facer en casos de, queimaduras, convulsións febrís, caídas, feridas e alerxias.
Os asistentes marcharon da charla cun botiquín en forma de coñecementos que poderían axudalos a salvar a vida dos máis pequenos da casa, ou como pouco evitar un mal rato. 

O público comezou a chegar á hora citada, e pasados os minutos de cortesía comezamos xa coa sala máis chea: mamás, papás, tíos e incluso algún avó que querían estar preparados para calquera situación desagradable relacionada coa saúde dos seus pequenos. No transcurso do obradoiro Pepe invitou a quen quixese a practicar o aprendido en relación á reanimación cardio-pulmonar, e tamén animaba aos asistentes a realizar calquera pregunta que se lles pasase pola cabeza. Tivemos preguntas moi variadas, tan interesantes como: 


    - De canto tempo dispoñemos para reanimar a un bebé ou neno antes de que sexa demasiado tarde? 

    - Por que os procesos febrís son positivos para os nenos e en que situacións hai que intervir con medicación? 
    - Cuestións relacionadas coa cura de feridas: Betadine sí ou non? Auga osixenada? 
     - En que momento debemos acudir a urxencias cando temos un brote alérxico? 

Pepe respondeu a estas e máis preguntas ademais de aclarar temas como a diferencia entre urxencia e emerxencia, por que ante unha urxencia non é aconsellable acudir a un centro de saúde, a imposibilidade de sufrir un atragantamento con determinados alimentos, a importancia de aprender primeiros auxilios dende ben pequenos, cando chamar ao 061 ou ao 112, etc... 


Os asistentes saíron con moita información práctica e moi satisfeitos ao sentirse máis preparados para reaccionar ante as diferentes situacións, algunhas máis cotiás que outras. Esperemos non vivir nunca estas dificultades, pero no caso de facelo, agora sabemos como reaccionar.










martes, 29 de marzo de 2016

Nova sede Teta e Coliño: A Coruña


A ASOCIACIÓN TETA E COLIÑO anuncia con gran ilusión a próxima apertura dunha nova sede na cidade de A CORUÑA.

Gustaríache participar deste grupo? queres manterte ó día das novidades? anímaste a indicarnos que tipo de actividades che gustaría que organizasemos sobre lactancia e crianza con apego? 

Pois permanece atenta ós nosos canais de difusión! E para calquera cousa que nos queiras contar ou suxerir, escríbenos aquí: tetaecolinhocorunha@gmail.com
Grazas!


lunes, 28 de marzo de 2016

Obradoiro alimentación autorregulada - BLW en Milladoiro

A Asociación Teta e Coliño convídavos ó próximo obradoiro de alimentación complementaria, que estará centrado nas condicións fisiolóxicas e a autorregulación por parte do bebé. Falaremos do coñecido como "baby led weaning" que tanto éxito ten entre os nosos fillos/as.
Contemplaremos a nutrición como acto físico e tamén emocional, cultural e social. 
Compartiremos recomendacións, aportaremos bibliografía e coñeceremos as experiencias de varias familias.
E, por suposto, atenderemos dúbidas das asistentes.

Obradoiro gratuíto. Prazas limitadas, inscrición previa en tetaecolinho@gmail.com indicando: nome e apelidos de cada asistente, idade do bebé e socia/non socia.

Día: mércores 6 de abril 2016
Hora: 17:30h
Lugar: Casa de Cultura de Milladoiro (Ames - A Coruña). Avenida do Porto, s/n.

viernes, 18 de marzo de 2016

Charla primeiros auxilios

A asociación Teta e Coliño ofrecerá unha charla informativa sobre primeiros auxilios en bebés e nenos.

Abordaremos cuestións tipo a quen e onde acudir cando nos atopamos cunha urxencia, as novas TIC como recurso, manobras básicas de reanimación, atoramentos, febre, convulsións, reaccións alérxicas...

Será facilitado por Pepe Aguilera, enfermeiro do 061 Galicia e estará á vosa disposición para resolver todas as dúbidas que vaian xurdindo.

CHARLA GRATUÍTA
Prazas limitadas e inscrición previa no correo tetaecolinhovigo@gmail.com indicando:
-Nome e apelidos
-Socia ou non socia de Teta e Coliño

Día: venres 01/04/2016
Hora: 17:00h
Local: Vigosónico (Estrada do Portal s/n 36313- Vigo. Polígono Tecnolóxico de Valadares, ao lado do vial de baixada da Universidade
) 

Obradoiro de porteo con RN e bebé pequeno (0-6 meses)

A asociación Teta e Coliño ofrecerá un obradoiro no que abordaremos as diferentes posibilidades para portear un bebé de poucos meses ou acabado de nacer.

Será facilitado por voluntarias de Teta e Coliño e veranse os diferentes tipos de portabebés que podemos empregar, así como a forma segura e ergonómica de facelo, tanto para porteador como para porteado.

OBRADOIRO GRATUÍTO
Prazas limitadas e inscrición previa no correo tetaecolinhovigo@gmail.com indicando: 
-Nome e apelidos
-Idade do bebé

Día: sábado 02/04/2016
Hora: 11:00h
Local: Centro cívico de Saiáns (Vigo)